La poesia della settimana: Salvatore Di Giacomo

Di Giacomo pe’ fa cuntento ’o pate e ’a mamma jette a‘ scola e, quanno se facette gruosso, jette all’università e se screvette a‘ facultà ’e medicina.

di Piero Buscemi - martedì 24 luglio 2012 - 3851 letture

’E cecate ’e Caravaggio

Dimme na cosa. T’allicuorde tu
 e quacche faccia ca p’’o munno e’ vista,
 mo ca pe’ sempe nun ce vide cchiù?

Sì, m’ allicordo; e tu?-No, frato mio;
 io so’ nato cecato. Accussì ncielo,
 pe mme murtificà, vulette Dio…

Lassa sta’ Dio!…Quant’ io ll’ aggio priato,
 frato, nun t’’o puo’ manco mmaggenà,
 e dio m’ ha fatto addeventà cecato.

E’ overo ca fa luce pe la via
 ’o sole?…E comm’ è ’o sole?-’O sole è d’ oro,
 comme ’e capille ’e Serrafina mia…

Serrafina?…E chi è? Nun vene maie?
 Nun te vene a truvà?-Sì…quacche vota…
 E comm’ è? Bella assaie?-Sì…bella assaie…

Chillo ch’ era cecato ’a che nascette
 Suspiraie. Suspiraie pure chill’ato,
 e ’a faccia mmiezz’ ’e mmane annascunnette.

Dicette ’o primmo, doppo a nu mumente:
— Nun te lagnà, ca ’e mammema carnale
 io saccio ’a voce…’a voce sulamente…

— E se stettero zitte. E attuorno a lloro
 addurava ’o ciardino, e ncielo ’o sole
 luceva, ’o sole bello, ’o sole d’ oro…

Salvatore di Giacomo (Sabbatore e’ Jacuvo) (Napule, 12 ’e màrzo 1860 – Napule, 4 ’e abbrile 1934), è stato ’nu grande pueta napulitano, sicuramente ’o cchiù grande, scrittore ’e rumanze drammatiche, d’opere tragiche p‘ ’o tiatre e articule ’e cultura ’ncopp’ ’e giurnale.

E’ stato pure ll’autore ’e ’nu sacco ’e poesie napulitane, assaje famose, (paricchie ‘e chesti ccà, fujeno pure musicate e addeventajeno canzone), ca rappresentano ’na parte assaje ’mpurtante d’a storia d’a cultura napulitana. ’O pate era ’nu miedeco d’e criature e ’a mamma era ’na musecista. Di Giacomo pe’ fa cuntento ’o pate e ’a mamma jette a‘ scola e, quanno se facette gruosso, jette all’università e se screvette a‘ facultà ’e medicina, ma ’o 1886 lassaje ’a scola e ’e studie, p’addeventà giurnalista d’a paggena d’a letteratura d’o “ Curriere d"o Matino “. Doppo ’nu poco ’e tiempo, lassaje ’o Curriere e passaje ô “Pro Patria“ primma e po‘ doppo a‘ “Gazzetta“.

D’o 1893 pigliaje ll’incarico ’e responsabile ’e biblioteca, dint’e cchiù importante biblioteche d’a città, (’a Biblioteca d"o Conservatorio a San Pietro a Maiella, ’a Biblioteca ’e l’Università e ’a Biblioteca Naziunale). ‘O 1902 addeventaje ’o direttore d’a sezione indipendente "Lucchesi-Palli", d‘ ’a Biblioteca Naziunale e d‘ ’o 1925 fine ô 1932 avette ’a qualifica ’e direttore generale. ’O 1929 ce detteno ’o titulo d’ “Accademico d’Italia“

Cierti vierze suoje d’o 1885, ca a isso nun le piacevene manco tante assaje, (tante ca nun ’e mettette dint"e raccolte ca curava isso stesso perzunalmente), fujene musicate da Francisco Paolo Tosti e avettene ’o destino furtunato d’addeventà una d’e cchiù famose canzone napulitane ’e tutte ’e tiempe, e canusciute pe‘ tutto ’o munno : “A Marechiare“.


- Ci sono 0 contributi al forum. - Policy sui Forum -